Krystof Buttigieg, mill-Qala Għawdex, twieled nhar is-26 ta’ Lulju 1986, iben Sammy u Frances nee Muscat. Fil-familja jiltaqgħu hu u oħtu Marouska, iżgħar minnu. Krystof beda l-edukazzjoni tiegħu fil-kindergarten u mbagħad fl-Iskola Primarja tal-Qala, bejn is-snin 1991 u 1997. Wara kompla l-istudji tiegħu fl-iskola sekondarja tas-Seminarju Minuri tal-Qalb ta’ Ġesù u mbagħad s-sixth form. Fl-istess żmien huwa kien jattendi wkoll il-preseminarju flimkien ma’ żgħażagħ oħra li kienu jfittxu aktar dwar is-sejħa tagħhom mill-Mulej. Hu kien jgħin u jattendi f’diversi għaqdiet tal-parroċċa, l-ewwelnett tal-abbatini u l-vokazzjonijiet, il-MUSEUM, Radju Leħen il-Qala, il-Kor Magnificat, l-Għaqda Mużikali Ite ad Joseph, l-Għaqda Briju San Ġużepp, l-Għaqda Menhir Qala Folk Group, u ta’ kull sena jgħin ukoll f’diversi attivitajiet marbuta mal-palk u d-drammi fl-istess parroċċa tal-Qala.
F'Settembru tal-2004, Krystof beda l-formazzjoni tiegħu għas-saċerdozju fis-Seminarju Maġġuri tal-Qalb ta' Ġesù u bejn is-snin 2007 u 2008, huwa għamel l-esperjenza tas-sena intermedjarja ġewwa Ruma, fil-parroċċa ta’ Sant’Injazju t’Antijokja. Lura minn din is-sena huwa kompla l-formazzjoni tiegħu fis-Seminarju hekk li fi Frar tal-2009, irċieva l-ministeru tal-Lettorat u f'Diċembru tal-istess sena rċieva l-ministeru tal-Akkolitat. Huwa ġie ordnat Djaknu minn idejn Mons. Isqof Mario Grech, nhar il-Ħadd 20 ta' Ġunju, fil-Katidral tal-Assunta f’Għawdex, u sejjer jirċievi l-Ordni tal-Presbiterat nhar is-Sibt, 28 ta’ Mejju 2011.
